L'app cuntegna tut ils tschintg idioms rumantschs sursilvan, sutsilvan, surmiran, vallader e puter sco era il rumantsch grischun. Perquai che las datas vegnan tuttas telechargiadas cun l’installaziun, funcziunescha l’app pli tard era senza connexiun cun l’internet.

Las datas linguisticas derivan dals dicziunaris uffizials che vegnan era duvrads en l’instrucziun. Ils dicziunaris dals idioms surmiran e sutsilvan sco era dal rumantsch grischun derivan da pledarigrond.ch, las datas sursilvanas da vocabularisursilvan.ch e quellas dal vallader e dal puter sa basan sin ils dicziunaris da «Meds d'instrucziun dal Grischun».